O‘zbekistonda jinsiy zo‘ravonliklar va ayol-qizlarga nisbatan kuch ishlatish, qasddan jarohat yetkazish holatlari kundan-kun jamoatchilikning ko‘proq diqqatini tortmoqda.
Afsuski, bunday paytlarda ularning nolasiga quloq tutadiganlar juda-juda kam topiladi yoki yo‘q...
Shu sababli biz ko‘mak va murojaat qilishingiz uchun ushbu saytni ishga tushirdik.
Yordam yo‘riqnomasi
102 raqamiga qo‘ng‘iroq qiling:
Ichki ishlar bo‘limi 102 qisqa raqamiga qo‘ng‘iroq qiling, agar telefoningiz bo‘lmasa, xavfsiz joyga yoki jamoat joyiga yaqin manzilga borishga harakat qiling. Sizda qo‘rquv, ilojsizlik va keskin ruhiy tushkunlik boshlangan bo‘lishi mumkin. Ushbu vaziyatda bu holatlarning jabrlanuvchida kuzatilishi tabiiy. Bu sizning harakatlaringiz oqibati emasligi, aybdor emasligingiz va siz uyalishingiz kerak emasligini tushunishga harakat qiling.
Sog‘ligingizni
o‘ylang:
Bu vaqtda sog‘lig‘ingiz, hayotingizga salbiy ta’sir qiladigan tezkor harakatlarni amalga oshirmang, chuqur nafas oling. Suv yoki suyuqlik ichib oling. Siz uchun noqulay, bosim beruvchi xayollarni o‘ylamaslikka harakat qiling. Har qanday holatda ham sizga ishonuvchi, sizga madad bera oladigan insonlar borligini o‘ylang.
Xavfsizligingizga ishonch hosil qiling:
Ichki ichlar bo‘limi xodimlaridan hayiqmang, sizning huquqingizni himoya qilish – ularning burchi. Ularning himoyasiga ishonishingiz, savol berilganida yoki ariza to‘ldirayotganingizda haqiqiy, aniq ma’lumotlarni yozib / so‘zlab berishingiz zarur bo‘ladi. Ichki ishlar bo‘limida Xotin-qizlar masalalari bo‘yicha nozir sizga himoya orderi beradi. U tazyiq va zo‘ravonlik qurbonlari uchun davlat muhofazasini ta’minlaydi.
Huquqingiz poymol bo‘lmasin:
Sizga zo‘ravonlik qilgan shaxs begona bo‘lsa, uni qidiruvga berishlarini va qonuniy jazo tayinlanishini, agar u begona bo‘lmasa, o‘z huquqlaringiz poymol bo‘lmasligi zarurligini tushuning. Chunki qonuniy nazoratsiz begona zo‘ravon boshqa xotin-qizlarga, begona bo’lmagan zo‘ravon, tazyiqchi esa sizga yana bosim qilishi, kuch ishlatishi mumkin.
Holat yana takrorlansa:
Agar shunday holat (himoya orderingiz bo‘lsa-da) yana takrorlanadigan bo‘lsa, dastlab Ichki ishlar bo‘limiga, bu muammolar girdobidan ruhiy tomonlama chiqib keta olmayotgan bo‘lsangiz, ayollar hamjamiyatlari, shelterlar va malakali ruhshunoslarga qo‘ng‘iroq qilishni yoki siz bilan bog‘lanishlari uchun hikoyangizni quyidagi qismda yozib qoldirishni tavsiya etamiz (ushbu hikoyalar, bog‘lanish raqamlari sir saqlanadi).
Loyiha haqida
Nolalar.com – butun O‘zbekiston jamoatchiligining e’tiborini ayollarga nisbatan zo‘ravonlikdan ogoh bo‘lish, uning oldini olish va asoratlarini yengillashtirish uchun yaratilgan loyihadir.
Milliy mass-mediani qo‘llab-quvvatlash va rivojlantirish jamoat fondi tomonidan ilgari surilgan loyiha tashabbusi kreativ direktor Ahmad Sobitovga tegishlidir. Loyiha ijodiy jamoasi tarkibidan, shuningdek, Mirzayor Erkinov, Mixail Zaimbetov, Abdumajid Mahmudovlar ham o‘rin olgan.
Unda ayol-qizlarning zo‘ravonlik, ularga nisbatan kuch ishlatish vaqtidagi nolalari ham tushirilgan. Loyihaning asosiy maqsadi – so‘nggi yillarda o‘zbekistonlik ayollarning zo‘ravonlik qurboni bo‘layotgani haqida media manbalarda tez-tez uchrayotgan yangiliklar fonida unga jamoat joylarida ham e’tiborni kuchaytirish, mavzuni yanada dolzarblashtirish bilan birgalikda salbiy vaziyatlarning sonini ham keskin kamaytirishdan iborat.
Loyihaning vizual yechimida asosiy e’tibor barchamizning ko‘zimizga ovoz to‘lqinlari ekvalayzeri shaklida ko‘ringan detallarni milliy mato – adras bezaklarini yodga soluvchi qismlar bilan uyg‘unlashtirishga qaratiladi.